Oleh: rullyindrawan | Desember 8, 2010

URANG SUNDA MAH TEU HEUREUT DEULEU

URANG SUNDA MAH TEU HEUREUT DEULEU
Rully Indrawan

Plato (427 – 347 SM) netelekan yen puluhan rebu taun katukang aya daratan raksasa anu kaitung rohaka disabudeureun Samudera Atlantik sakuloneun Laut Tengah rahayatna geus kaetung maju dina sagala widang. Maranehna geus mampu ngahasilkeun emas kalawan perak anu kaetung reana. Kakawasaanana ngawengku daratan eropa jeung daratan nu aya di afrika. ATLANTIS digambarkeun miboga peradaban teknologi nu geus maju kacida. Malahan mah, ceuk sakaol kapal terbang ge geus aya harita. Ku alatan kajadian alam, utamana bituna gunung-gunung, nu di susul ke lini jeung banjir anu kaetung rohaka sarta leehna es di sabaraha bagian wilayah. Jadi musabab sabagian daratana titeuleum diteureuy bumi, sakitar 11.600 taun katukang. Bagian anu leungit eta nu ku sabagian ahli kakoncara disebut ”Benua yang hilang atawa Atlantis”. Perkara eta kaunggel dina catatan dialog Plato, ngaliwatan buku Critias jeung Timaeus. Tug nepi kaayeuna para ahli nitenan kalayan imeut dilebah mana wilayah Benua Atlantis anu tilem eta saestuna.
Salah sahiji panaluntikan nu dilakukan ku Aryso Santos salila 30 tahun, negeskan yen Atlantis teh wilayah anu ayeuna disebut Indonesia. Hal eta kaunggeul dina bukuna The Lost Continent Finally Found, The Definitifve Localization of Plato‘s Lost Civilization (2005). Santos oge boga kayakinan anu dirojong sabagian arkeolog Amerika Serikat (AS), yen benua Atlantis teh, baheulana hiji daratan gede anu disebut Sunda Land, wilayahna anu ngawengku Sumatra, Jawa dan Kalimantan. Pantes pisan baheula Indonesia teh dibagi jadi Sunda Besar jeung Sunda Kecil, saacan Mohamad Yamin salaku menteri pendidikan ngahapus istilah eta. Lamun panaluntikan Aryso Santos teh bener, beu teu ku henteu reueus kacida. Geuning sunda teh jembar boga karuhun anu sakitu onjoyna.
Naha urang Sunda kahareup bakal digjaya siga karuhunna? Kuring mah yakin, bisa pisan. Sumber daya alam kaasup lubak-libuk upama dibanding daerah lianna. Sumberdaya manusia, karuhan lembaga pendidikannana oge hararade. Matak ITB, IPB, IPDN, IKOPIN (paguron anu khas, sanes universitas) aya di tatar sunda oge ciciren urang langkung siap. Kari modal sosial, har apan aya Paguyuban Pasundan, anu pancenna mere syiar budaya malar urang sunda boga tetekon keur kahirupanana. Dina sajarah, sumbangan Paguyuban Pasundan kana kamekaran bangsa teu kinten gedena, ngan asa can kaguar kabeh.
Basa menang pancen mupuhuan kagiatan milangkala Paguyuban Pasundan ka 89 asana namah. Ngahaja mukaan ensklopedia heubeul, ari gorehel teh menang info nu sakitu alusna. Yen Ir H.Djuanda teh kantos mancen janten sekjen Paguyuban Pasundan. Mantenna urang Sunda mah geus apal ti leleutik, atuh yasanya kana lemah cai di araku ku seke seler lianna di lemah cai urang. Can lila sabada kuring menang tugas mupuhuan IKOPIN, karak engeuh yen nu mokalan koperasi di Indonesia teh geuning oge tokoh Paguyuban Pasundan. Dina satiap Hari Koperasi 12 Juli, ngaran Niti Somantri pasti disebut-sebut, disebut dina inyana mangsa eta jadi Wakil Sekjen Paguyuban Pasundan. Sabada dipaluruh teu loba nu apal perkara eta di lingkungan Paguyuban Pasundan. Heueuh keun wae, ngan jadi leuwih panceg yen urang teh boga sajarah anu jembar.
Jembarna Sunda Kiwari
Kang Ibing pernah nganaha-naha ka sim kuring basa ngariung saacan acara walimahan puterana, “Teu rido kang amah mun urang Sunda punta penta kadudukan, kuduna oge di rebut ku kamampuh”, kuring mah mesem wae da ngarti pamaksudanana. Harita Kang Ganjar (Rektor Unpad) mairan ku harepan. Kuring sapamadegan, yen urang sunda teu kudu nungguan dibere kesempatan tapi kudu neangan jeung nyiar kasempeten. Salian ti dibere mah wirang ongkoh, tapi pan urang mah turunan karuhun nu unggul.
Aya dua kesempatan keur kuring tepung jeung tokoh dunia ngawakilan nagara. Kahiji taun 2008 basa ngarencangan Pa Ginandjar Kartasasmita, salaku ketu DPD-RI, nepungan PM Jepang harita, Fukuda. Harita salian kuring jeung Dubes RI keur Jepang, Yusuf Anwar, urang Singaparna. Diajak oge Iwan, penterjemah ti Kedubes RI di Jepang, manehna ngaharewos “Ieu mah utusan ti nagara Pasundan”, bari ngaheheh da manehna oge urang Cianjur pituin.
Kadua, basa awal bulan Juli taun ieu, nyarengan ka Timor Leste (TL), Ibu Menteri Perencanaan Pembangunan/Ketua Bappenas Prof.Dr.Armida Alisyahbana (kuring mah asa lebih anteb keneh nyebut Armida Kusumaatmadja, bari heureuey, wani heureuy teh pedah dina acara informal diantara anggota delegasi mantenna nyebat kuring sobat nu geus lila wawuh); tepung jeung Ramos Horta (presiden TL) jeung Xanana (PM TL). Harita kuring ditugaskan ku Kementerian Koperasi dan UKM, sedeng nu ditugaskeun ti Bappenas salasawiosna Kang Dida, ari ti utusan Menko Perekonomian dipimpin ku Kang Yudi, sarua jeung kang Dida, papada urang Bandung. Atuh Sabatae, di ditu teh ngobrol make basa Sunda wae. Sok komo rombongan ti Unpad nu dipimpin ku Pa Zul (Pembantu Rektor IV) oge ceu Erni (Dekan FE) nyandak balad teh urang sunda pisan. “Kongres urang Sunda” di Timor Leste, di jengkepan ku Kang Dedi, Dubes RI di ditu, anu oge pituin Sunda lulusan FH Unpad. Tuh ceuk saha urang sunda teu ngambah nagara. Sigana silaturahmi papada urang kudu ditingkatkeun boh kuantitas oge kualitasna.
Salah saurang sobat sim kuring, manehna jadi deputi di salah sahiji kementerian, pernah ngageuri ku kabiasaan urang Sunda. Dilahirkeun di Cirebon, sakola di Jogja, lila NTB, tapi ngarasa urang Sunda. Inyana humandeuar, hayang pisan ngariung jeung batur salembur ti tatar Sunda, sok sanajana kalan-kalan mah sok jadi deukeut kana pipaseaeun oge, majar teh. Jadi inget ka ibu Eti, urang Cipetir Sukabumi, muka warung timbel di kota Medan bari teu petot-petot ngembarakeun Wargi Pasundan keur riung mungpulung ngumbar katineung ka lemah cai banjar pamidangan; kalawan mayeng di bumina.
Dina dua bulan ieu (Juni-Juli) sok remen ider-ideran salian ti medan, kota-kota lianna nu datangan sok bari ngahaja nepungan urang sunda nu keur bubuara. Hasilna, teu weudeu ngajenghokna. Dina babasaan, prototife urang sunda mah heureut deuleu, pondok lengkah, jeung sok nyalindung ka gelung. Geuning henteu kitu, transmigran urang boh nu aya di Bolaang Mongodow (Sulut), jeung Namlea (Pulau Buru) kaitung arulet pisan. Khusus nu di Namlea, hiji kabupaten pamekaran tapi maju ngelehkeun kabupaten asalna. Ceuk bupati na ka kuring, “Kuncinya saya di dukung oleh Korpri”. Can ditembalan, inyana nyambung “Korpri itu Korp Priangan” bari gumujeng. Pantes wae geuning, sekda na urang Tasik, kadisna urang Sumedang, Dandim na urang Subang, Kajari jeung Kapolresna lila di Sukabumi. Ampir sarua jeung nu pernah diomongkeun ku Fadel Muhamad 3 (tilu) taun ka tukang ka kuring di bumina pa Ginandjar, di Gorontalo ceuk inyana sering rapat teh make basa sunda wae, da loba pajabatna urang sunda cenah. Geuning simana horeng, kabuktian urang sunda lain hayam pelung, nu ngan bisa kongkorongok di lembur sorangan sabada di usapan, tapi satria-satria pinilih anu paningalna jembar, teuneung ludeung tandang makalangan lain ngan saukur jago kandang.
Kasaksen pisan jembarna urang sunda mangsa kiwari oge mangsa bihari keur pieunteungeun urang ka hareup. Boa enya, jeung anggap enya wae, yen urang teh turunan seke seler nu pernah jugala rebuan taun katukang. Pagawean nalikung maneh, bari sisiku ka papada dulur, heureut deuleu pondok tenjo; eta lain watek urang. Namung da teu rek wuri-wuri kanu bade ngemut mung saukur. Wilujeng

About these ads

Responses

  1. Cenghar Kang, asa narawangan deui yeuh, sareng lengkah dumadakan asa leuwih panceg, sihoreng Ki Sunda teh tiasa dijantenkeun turus. hatur nuhun ah, asa merenah deuih di aosna, margi cepil teh rupina tos katutupan ku basa gaul terminal sareng basa barudak sakola kiwari nu di atik sakirang-kirangna 3 basa. namung sadayana ngagantung sunda teu ka udang, basa indonesia can merenah, basa inggris teu ka dugi. antukna ngaraos sono pisan kana rumpaka sunda nu sajati sapertos seratan akang teh.
    Nepangkeun simkuring kantos ka atik ku akang di taman sari angkatan 94 PKn

    • nuhun yi

    • Hatur nuhun.


Berikan Balasan

Isikan data di bawah atau klik salah satu ikon untuk log in:

WordPress.com Logo

You are commenting using your WordPress.com account. Logout / Ubah )

Twitter picture

You are commenting using your Twitter account. Logout / Ubah )

Facebook photo

You are commenting using your Facebook account. Logout / Ubah )

Google+ photo

You are commenting using your Google+ account. Logout / Ubah )

Connecting to %s

Kategori

Ikuti

Get every new post delivered to your Inbox.

%d blogger menyukai ini: